About Us

മുസ്‌ലിം വിമന്‍സ് കൊളോക്കിയം- പെണ്‍ വായനകളുടെ പൊളിച്ചെഴുത്ത്

മുസ്‌ലിം പെണ്ണ് സമൂഹത്തില്‍ സജീവ ചര്‍ച്ചയാണിന്ന്. സമുദായത്തിന്റെയും പുരോഹിതരുടെയും പീഡനത്തിലും അടിച്ചമര്‍ത്തലിലുമാണ് മുസ്‌ലിംങ്ങളിലെ പെണ്‍വര്‍ഗമെന്നാണ് മതേതര പൊതുമണ്ഡലത്തിന്റെ വിലയിരുത്തല്‍. ആഗോളതലം മുതല്‍ കേരളത്തിലെ നാട്ടിന്‍ പുറങ്ങളില്‍ വരെ ഈ ലളിതയുക്തി ഉയര്‍ന്ന് കേള്‍ക്കാറുണ്ട്. പല മുസ്‌ലിം രാജ്യങ്ങളിലും കടന്നുകയറാനും അവിടെ യുദ്ധങ്ങള്‍ നയിക്കാനും പാശ്ചാത്യരാജ്യങ്ങളുടെ പ്രധാന ന്യായം അവിടെയുള്ള പെണ്ണിന്റെ വിമോചനമായിരുന്നു. ഇന്ത്യയില്‍ ചില നിയമ ചര്‍ച്ചകളില്‍ സംഘ്, ഇടത്, ഗാന്ധിയന്‍ വ്യത്യാസമില്ലാതെ മുസ്‌ലിം സ്ത്രീയുടെ വിമോചനത്തിനായി വാദിക്കുന്നവരാണ്. കൊച്ചുകേരളത്തിലും മുസ്‌ലിം പുരുഷനില്‍ നിന്ന് മുസ്‌ലിം സ്ത്രീയെ രക്ഷിച്ചെടുക്കാനുള്ള വ്യഗ്രതയിലാണ് മതേതര മുഖ്യധാര. ഇത്തരം എല്ലാ മുന്‍വിധികളെയും ഉദാരസ്വതന്ത്രവാദങ്ങളെയും സര്‍ഗാത്മകമായി ചോദ്യം ചെയ്ത് മൂന്ന് പതിറ്റാണ്ടിലേറെയായി ഗേള്‍സ് ഇസ്‌ലാമിക് ഓര്‍ഗനൈസേഷന്‍ (ജി.ഐ.ഒ) രംഗത്തുണ്ട്.

സ്ത്രീ ശരീരത്തിന്റെയും സ്വത്വത്തിന്റെയും കച്ചവട-കമ്പോള വല്‍ക്കരണത്തിനെതിരെ തുടക്കത്തില്‍ തന്നെ ജി.ഐ.ഒ പ്രതിഷേധമുയര്‍ത്തിയിരുന്നു. ഇസ്‌ലാമില്‍ സ്ത്രീക്കുള്ള സ്ഥാനത്തെയും മഹത്വത്തെയും ബോധ്യപ്പെടുത്താനും ശ്രമിച്ചു. മുസ്‌ലിമെന്ന അസ്തിത്വമാണ് പ്രശ്‌നമെന്നും ഇസ്‌ലാമിനെതിരെ പ്രചാരണങ്ങള്‍ക്കാണ് സ്ത്രീവിമോചനമെന്ന മതേതര വ്യവഹാരം ഉപയോഗിക്കപ്പെടുന്നതെന്നും ജി.ഐ.ഒ തിരിച്ചറിഞ്ഞു. ഇതിനെ അക്കാദമികമായും രാഷ്ട്രീയമായും പ്രതിരോധിക്കുന്നതോടൊപ്പം ഇസ്‌ലാമില്‍ സ്ത്രീ നടത്തുന്ന വിവിധാവിഷ്‌കാരങ്ങളെ സമൂഹത്തിലെത്തിക്കാനുള്ള പരിപാടികളും ഇസ്‌ലാമിക വിദ്യാര്‍ഥിനി പ്രസ്ഥാനം സംഘടിപ്പച്ചു. തര്‍ത്തീല്‍, കാന്‍വാസ് സ്‌കാര്‍ഫ്, എക്‌സ്‌പോസ് ഈവ് എന്നിവ ഇത്തരം ആവിഷ്‌കാരങ്ങളില്‍ ചിലതായിരുന്നു. മുസ്‌ലിം പെണ്ണ് ആത്മീയതയെയും വിശ്വാസത്തെയും ഖുര്‍ആനോടുള്ള ബന്ധത്തിലൂടെ വരകളിലൂടെ മറ്റാവിഷ്‌കാരങ്ങളിലൂടെ പ്രകടിപ്പിക്കുകയാണ് ഇവിടെ ചെയ്തത്. ഇത്തരം പ്രതിരോധങ്ങള്‍ക്കും ചിന്തകള്‍ക്കും ആവിഷ്‌കാരങ്ങള്‍ക്കും കൃത്യമായ ദിശനല്‍കുന്ന അക്കാദമിക ഇടപെടലായിരുന്നു ഫെബ്രുവരി 25, 26 തിയതികളില്‍ കോഴിക്കോട് ജെ.ഡി.റ്റി കാമ്പസില്‍ നടന്ന മുസ്‌ലിം വിമന്‍സ് കൊളോക്കിയം.

സദസ്സിലും വേദിയിലും പെണ്ണിന്റെ നിറസാന്നിദ്ധ്യത്തോടെയാണ് പരിപാടികള്‍ തുടങ്ങിയത്. ഇന്ത്യയിലെ സ്ത്രീ അവകാശപോരാട്ടങ്ങളില്‍ സജീവയായ അഭിഭാഷക ഫഌവിയ ആഗ്നസ് ആണ് കൊളോക്കിയത്തിന്റെ ഔദ്യോഗിക ഉല്‍ഘാടനം നിര്‍വഹിച്ചത്. സ്ത്രീയെ കുറിച്ചുള്ള സങ്കല്‍പങ്ങളില്‍ കാലികമായ മാറ്റത്തിന് സമൂഹം തയ്യാറാകണമെന്ന് ആഗ്നസ് ആവശ്യപ്പെട്ടു. മുസ്‌ലിം സമുദായം സ്ത്രീകളുടെ അവകാശങ്ങളെ കുറിച്ച് ആരോഗ്യകരമായ ചര്‍ച്ചകള്‍ നടത്തണം. ഇസ്‌ലാമോഫോബിയയുടെ പേരില്‍ മുസ്‌ലിം സ്ത്രീയുടെ യഥാര്‍ഥ പ്രശ്‌നങ്ങള്‍ അവഗണിക്കപ്പെടരുതെന്നും അവര്‍ കൂട്ടിച്ചേര്‍ത്തു. ജമാഅത്തെ ഇസ്‌ലാമിയുടെ അഖിലേന്ത്യാ ജനറല്‍ സെക്രട്ടറി എഞ്ചിനീയര്‍ മുഹമ്മദ് സലീം ആയിരുന്നു ഉല്‍ഘാടന സെഷനിലെ മുഖ്യാതിഥി. മുസ്‌ലിം സ്ത്രീയെ സംരക്ഷിക്കാനെന്ന പേരില്‍ ഇസ്‌ലാമിനെ പ്രതിക്കൂട്ടിലാക്കാനാണ് നിക്ഷിപ്ത താല്‍പര്യക്കാരുടെ ശ്രമമെന്ന് അദ്ദേഹം പറഞ്ഞു. ശരീഅത്താണ് സ്ത്രീക്ക് യഥാര്‍ഥ് സ്വാതന്ത്ര്യം നല്‍കുന്നത്. ശരീഅത്തിന്റെ ഉദ്ദേശ്യം പൂര്‍ത്തീകരിക്കാന്‍ മുസ്‌ലിം സമുദായം ശ്രദ്ധ നല്‍കണമെന്നും അദ്ദേഹം കൂട്ടിച്ചേര്‍ത്തു. ജമാഅത്തെ ഇസ്‌ലാമി കേരള അമീര്‍ എം.ഐ അബ്ദുല്‍ അസീസ് ഉല്‍ഘാടന സമ്മേളനത്തില്‍ അധ്യക്ഷനായിരുന്നു. അഡ്വ. നൂര്‍ബീന റഷീദ്, കെ.കെ ഫാത്വിമ സുഹ്‌റ, ഫാത്വിമ തഹ്‌ലിയ എന്നിവരും സെഷനില്‍ സംസാരിച്ചു.

'ജ്ഞാനമീമാംസയും പാരമ്പര്യവും ജ്ഞാനാധികാരവും ഇസ്‌ലാമില്‍' എന്ന തലക്കെട്ടിലായിരുന്നു ആദ്യ അക്കാദമിക് സെഷന്‍. ഇസ്‌ലാമിലെ വൈജ്ഞാനിക പാരമ്പര്യത്തെയും അതിന്റെ ചരിത്രത്തെയും വിലയിരുത്തുന്നതും സ്ഖലിതങ്ങള്‍ ചൂണ്ടിക്കാണിക്കുന്നതുമായിരുന്നു ഡോ വര്‍ഷാ ബഷീര്‍ നേതൃത്വം നല്‍കിയ സെഷന്‍. റഹ്മത്തുന്നിസ എ, ഫര്‍ഹ ഒ.എ, വി.എ.എം അഷ്‌റഫ്, ഷഹ്‌ല കെ മുഹമ്മദ് ശമീം ടി.പി, ജാബിര്‍ അമാനി എന്നിവര്‍ വിവിധ മേഖലകളില്‍ പേപ്പറുകളവതരിപ്പിച്ചു.

ഉച്ചക്ക് ശേഷം ഫഌവിയ ആഗ്നസ് സദസ്സുമായി സംവദിച്ചു. 'മുസ്‌ലിം സ്ത്രീയും ഏകസിവില്‍കോഡിന്റെ രാഷ്ട്രീയവും' എന്ന തലക്കെട്ടിലായിരുന്നു സംഭാഷണം. തുടര്‍ന്ന് മുസ്‌ലിം സ്ത്രീയുടെ വിശ്വാസത്തെയും ഇസ്‌ലാമിനെയും പെണ്ണിന്റെ പക്ഷത്തുനിന്ന് വ്യാഖ്യാനിക്കാനുള്ള സാധ്യതകളെ അന്വേഷിക്കുന്ന സെഷനായിരുന്നു. വി.എ കബീര്‍ നേതൃത്വം നല്‍കിയ സെഷനില്‍ ബാസിമ ശഹാന വി, ഫാത്വിമ മദാരി, കെ.ടി ഹുസൈന്‍, ശഹനാസ് കെ.വി, ബിലാല്‍ ബിന്‍ അബ്ദുല്ല, നിയാസ് എ.കെ എന്നിവര്‍ പേപ്പറുകള്‍ അവതരിപ്പിച്ചു. ആദ്യ ദിവസം സായാഹ്ന സെഷന്‍ സദസ്സ് ആവേശത്തോടെയാണ് സ്വീകരിച്ചത്. ലിംഗസമത്വ സംവാദങ്ങളുടെ അപകോളനീകരണവും അതിനോട് മുസ്‌ലിം സ്ത്രീയുടെ നിലപാടും, ഇന്ത്യയിലെ സ്ത്രീപക്ഷ വ്യവഹാരങ്ങള്‍ എന്നീ മേഖലകളിലുള്ള വിവിധ വിഷയങ്ങള്‍ കേന്ദ്രീകരിച്ച് ഡോ വര്‍ഷാ ബഷീര്‍, ഡോ ജെന്നി റെവീന, ഡോ ഷെറിന്‍ ബി.എസ്, ഡോ ആര്‍ യൂസുഫ് എന്നിവരാണ് ഈ സെഷനില്‍ വിഷയങ്ങള്‍ അവതരിപ്പിച്ചത്. കെ.പി സല്‍വ സെഷനില്‍ ആമുഖഭാഷണം നടത്തി.

'മുസ്‌ലിം സ്ത്രീ സ്വത്വവും പ്രാതിനിധ്യവും' എന്ന തലക്കെട്ടിലായിരുന്നു അടുത്ത സെഷന്‍. ജെനി റൊവീന നേതൃത്വം നല്‍കിയ സെഷനില്‍ ഖദീജ മങ്ങാട്ട്, ഹുസ്‌ന മുംതാസ്, ഫെബ റഷീദ്, വി ഹിക്മതുല്ല, അഡ്വ ഫാസില എ.കെ, ജുവൈരിയ ഇറാം എന്നിവര്‍ പേപ്പറുകള്‍ അവതരിപ്പിച്ചു.
രണ്ടാം ദിവസം മുസ്‌ലിം സ്ത്രീയുടെ ദൈനംദിന ജീവിതവുമായി ബന്ധപ്പെട്ട സെഷന് ഷെറിന്‍ ബി.എസ് നേതൃത്വം നല്‍കി. ഒ.വി സാജിദ, അന്‍സിയറഹ്മാന്‍, അമല്‍ അബ്ദുറഹ്മാന്‍, ഫൗസിയ ശംസ്, ഫര്‍ഹാന ആഷിഖ് എന്നിവര്‍ വിഷയാവതരണം നടത്തി. തുടര്‍ന്ന് നടന്ന ലിംഗരാഷ്ട്രീയത്തിന്റെ ഡികൊളോണിയല്‍ സമീപനങ്ങളെ വിലയിരുത്തുന്ന സെഷന് സിമി കോറോട്ട് നേതൃത്വം നല്‍കി. ഉമ്മുല്‍ ഫായിസ പി.പി, മര്‍വ എം, നൂറുനിദ എം, സിമി കെ സാലിം എന്നിവര്‍ വിഷയങ്ങളവതരിപ്പിച്ചു. ഇന്ത്യയിലെ വിവിധ കാമ്പസുകളിലെ പ്രതിനിധികള്‍ അണിനിരന്ന കാമ്പസ് പൊളിറ്റിക്‌സ് ഐക്യദാര്‍ഢ്യ സെഷനില്‍ ലദീദ സഖ്‌ലൂണ്‍, ജെ.എന്‍.യു വിലെ ബുപാലി മഗാരെ, നിഖില ഹെന്റി, സല്‍വാ അബ്ദുല്‍ഖാദര്‍ എന്നിവര്‍ സംസാരിച്ചു. കേരളത്തിലെ വിവിധ കാമ്പസുകളില്‍നിന്നുള്ള വിദ്യാര്‍ഥികള്‍ തങ്ങളുടെ കാമ്പസ് അനുഭവങ്ങള്‍ പങ്കുവെച്ചു. അക്കാദമിക് സെഷനുകള്‍ക്ക് സമാപനം കുറിച്ചുകൊണ്ട് ജി.ഐ.ഒ സംസ്ഥാന പ്രസിഡന്റ് പി റുക്‌സാന സദസ്സിനെ അഭിമുഖീകരിച്ചു.

ഇസ്‌ലാമിക പ്രസ്ഥാനം കാലങ്ങളായി പൊതുമണ്ഡലത്തില്‍ നടത്തികൊണ്ടിരിക്കുന്ന ഇടപെടലുകളുടെ തുടര്‍ച്ചയായാണ് മുസ്‌ലിം വിമന്‍സ് കൊളോക്കിയം സംഘടിപ്പിക്കപ്പെട്ടത്. സമൂഹത്തിലുണ്ടാകുന്ന ഓരോ ചലനങ്ങളോടും പ്രതികരിക്കാനും അവയുടെ അക്കാദമികവും സാമൂഹികവുമായ പശ്ചാതലങ്ങളെ വായിക്കാനും അതിലൂടെ ഉയര്‍ന്നു വരുന്ന രാഷ്ട്രീയത്തോട് സംവദിക്കാനും എന്നും പ്രസ്ഥാനവും പോഷക സംഘടനകളും ശ്രമിച്ചിട്ടുണ്ട്. ഇസ്‌ലാമിക് അക്കാദമിക് കോണ്‍ഫറന്‍സ്, കേരള മുസ്‌ലിം ഹിസ്റ്ററി കോണ്‍ഫറന്‍സ്, മുഖദ്ദിമ അക്കാദമിക് സമ്മിറ്റ്, ഇസ്‌ലാമോഫോബിയ കോണ്‍ഫറന്‍സ് എന്നീ പരിപാടിക വിവിധ മേഖലകളിലുള്ള വ്യവഹാരങ്ങളെ അഭിമുഖീകരിച്ചിരുന്നു. അതിന്റെ തുടര്‍ച്ചതന്നെയാണ് മുസ്‌ലിം വിമന്‍സ് കൊളോക്കിയത്തിലൂടെയും ജി.ഐ.ഒ ലക്ഷ്യംവെച്ചത്. ഇസ്‌ലാമിക പ്രസ്ഥാനത്തിന്റെ മുന്നോട്ടുപോക്കിന് വലിയ മുതല്‍ക്കൂട്ടും വെളിച്ചവുമാകും പരിപാടിയെന്നാണ് പ്രതീക്ഷ. രണ്ട് ദിവസം ജെ.ഡി.റ്റി കാമ്പസില്‍ നിറഞ്ഞ് നില്‍ക്കുകയും ചര്‍ച്ചകള്‍കൊണ്ടും ചോദ്യങ്ങള്‍കൊണ്ടും സെഷനുകളെ സജീവമാക്കുകയും ചെയ്ത നൂറുകണക്കിന് സഹോദരികള്‍ അതിന്റെ സൂചനകളായിരുന്നു. മുസ്‌ലിം പെണ്ണിന്റെ പേര് പറഞ്ഞ് ഇസ്‌ലാമിനെ ക്രൂശിക്കുന്നവര്‍ക്ക് ആര്‍ജ്ജവത്തോടെ തലയുയര്‍ത്തി മറുപടി പറയാന്‍ തങ്ങള്‍ തയ്യാറാണെന്ന പ്രഖ്യാപനമായിരുന്നു ഇസ്‌ലാമിക വിദ്യാര്‍ഥിനി പ്രസ്ഥാനം നടത്തിയത്. ഇടപെടലുകള്‍ക്കും ചോദ്യങ്ങള്‍ക്കും സമയം പോരാതെ ഇടവേളകളില്‍പോലും ചര്‍ച്ചകള്‍ നടത്തേണ്ടി വരുന്ന തരത്തില്‍ സംഘാടകര്‍ ബുദ്ധിമുട്ടിയെങ്കിലും, അറിവിനോടും അന്വേഷണങ്ങളോടും പുതുതലമുറയും വിദ്യാര്‍ഥി-വിദ്യാര്‍ഥിനികളും പുലര്‍ത്തുന്ന ഈ ആഭിമുഖ്യം പ്രസ്ഥാനത്തിന്റെയും സമുദായത്തിന്റെയും മുന്നോട്ടുപോക്കിന് വലിയ മുതല്‍കൂട്ടാവും തീര്‍ച്ച.